Rydyn ni’n gwybod mai ein pobl yw ein cryfder mwyaf. Dyna pam rydyn ni’n gweithio’n galed i greu gofod lle mae pawb yn teimlo’n ddiogel, yn cael eu parchu ac yn cael eu cefnogi i ffynnu.
Nid dim ond pethau rydyn ni’n siarad amdanyn nhw yw lles, tegwch a chynhwysiant, maen nhw’n llunio’r ffordd rydyn ni’n dylunio ein gwaith a sut rydyn ni’n mynd ati i recriwtio.
Mae CGGC yn lle gwych i ddechrau neu dyfu eich gyrfa yn y sector gwirfoddol yng Nghymru. Byddwch chi’n cael cipolwg unigryw ar y gwaith hanfodol sy’n digwydd ledled y wlad ac yn chwarae rhan mewn cryfhau a chefnogi’r sector.
P’un a ydych chi’n cefnogi mudiadau, yn dylanwadu ar bolisi, neu’n rhannu straeon am newid, bydd eich gwaith yn helpu i wneud gwahaniaeth go iawn.
Rydyn ni eisiau i bawb deimlo eu bod yn gallu ymgeisio a ffynnu yma. Yn hytrach na disgwyl i bobl gyd-fynd â ffordd benodol o weithio, rydyn ni’n canolbwyntio ar gael gwared ar rwystrau. Mae hyn yn llunio sut rydyn ni’n dylunio ein rolau, yn mynd ati i recriwtio ac yn cefnogi pobl o ddydd i ddydd. Rydyn ni’n gwybod bod anghenion pobl yn wahanol, felly byddwn ni’n gweithio gyda chi i wneud yn siŵr eich bod chi’n gallu dangos eich cryfderau ar bob cam. Rydyn ni’n annog ceisiadau gan bobl anabl ac yn ymrwymedig i greu gweithle lle rydych chi’n teimlo eich bod yn cael eich cefnogi, eich gwerthfawrogi ac yn gallu gwneud eich gwaith gorau.
Rydyn ni’n cynnig ystod o fuddion sydd wedi’u cynllunio i gefnogi eich lles, cydnabod eich cyfraniad a rhoi hyblygrwydd i chi yn y ffordd rydych chi’n gweithio ac yn byw eich bywyd:
Rydyn ni’n gweithredu cynllun fflecsi ac yn cefnogi gweithio hybrid, fel y gallwch weithio mewn ffordd sy’n addas i chi.
25 diwrnod o wyliau blynyddol, ynghyd â gwyliau banc a phum diwrnod ychwanegol yn ôl disgresiwn.
Rydyn ni’n cyfrannu 9% at eich pensiwn i gefnogi eich dyfodol.
Rydyn ni’n gyflogwr Cyflog Byw Gwirioneddol ac yn sicrhau bod y cyflog yn adlewyrchu’r costau byw.
Mae ein Cynllun Arian Iechyd yn helpu i dalu costau gofal iechyd bob dydd, ochr yn ochr â chymorth lles ehangach. Fel budd-dal anariannol, mae swm bach o dreth yn gymwys yn unol â rheolau CThEF.
Mynediad i’n Rhaglen Cymorth i Gyflogeion i gael cyngor a chymorth cyfrinachol.
Mae ein cynllun gwirfoddoli i gyflogeion yn rhoi amser i chi gefnogi’r achosion sy’n bwysig i chi.
O 7 Medi 2026, byddwn yn treialu wythnos waith pedwar diwrnod am gyfnod o 12 mis. Yn ystod y cyfnod hwn, ein patrwm gwaith fydd dydd Llun i ddydd Iau. Bydd rhagor o fanylion am y treial yn cael eu darparu yn ystod y broses recriwtio, neu os oes gennych unrhyw gwestiynau am hyn, cysylltwch â ni drwy people@wcva.cymru.
Rydyn ni’n falch o fod wedi ein hardystio fel Lle Gwych i Weithio ac i gael ein cydnabod ar restr Great Place to Work UK 2026 fel un o’r Gweithleoedd Gorau ar gyfer Lles a hefyd ar gyfer Menywod. Mae’r cydnabyddiaethau hyn yn adlewyrchu ein hymrwymiad parhaus i greu diwylliant sy’n seiliedig ar ymddiriedaeth, cydweithredu, parch a lles.
Rydyn ni wedi ymrwymo i greu gweithle lle gall pawb perthyn a chyfrannu. Rydyn ni’n ceisio cael gwared ar rwystrau i gyfranogiad ac i greu mudiad tecach.
Rydyn ni’n dilyn y model anabledd cymdeithasol, gan ganolbwyntio ar gael gwared ar rwystrau unigolion yn hytrach nag ychwanegu atynt. Rydyn ni hefyd yn datblygu ymagwedd at fynd i’r afael ag anghydraddoldeb yn ei holl ffurfiau, gan gynnwys ein gwaith tuag at ddod yn fudiad gwrth-hiliol.
Rydyn ni eisiau i’n cyfathrebiadau fod yn glir, yn groesawgar ac yn hygyrch i gymaint o bobl â phosibl. Rydyn ni’n gweithio yn Gymraeg a Saesneg ac yn cefnogi cydweithwyr i fagu hyder yn yr ieithoedd a’r sgiliau cyfathrebu sy’n eu helpu i gysylltu ag eraill, gan gynnwys Cymraeg ac Iaith Arwyddion Prydain (BSL).
Ein nod yw gwneud ein cyfathrebiadau mor hygyrch â phosibl. Mae hyn yn cynnwys defnyddio iaith glir a chyflwyno fformatau hygyrch, ynghyd ag ystyried ystod o anghenion cyfathrebu. Os oes angen gwybodaeth arnoch mewn fformat neu iaith wahanol, byddwn bob amser yn gwneud ein gorau glas i gefnogi hyn lle gallwn.
Rydyn ni’n falch o fod yn fudiad dwyieithog sy’n gwerthfawrogi ac yn hyrwyddo’r Gymraeg a diwylliant Cymru. Rydyn ni’n cydymffurfio â Safonau’r Gymraeg ac yn annog pawb i ddefnyddio eu Cymraeg yn eu gwaith bob dydd.
O grwpiau ymarfer anffurfiol i rannu adnoddau Cymraeg yn fewnol, rydyn ni’n cefnogi staff ar bob lefel i fagu hyder a chyfrannu at y nod o gael miliwn o siaradwyr Cymraeg erbyn 2050.
Rydyn ni hefyd yn cydnabod pwysigrwydd Iaith Arwyddion Prydain (BSL) ac yn cymryd camau i gryfhau’r ffordd rydyn ni’n cefnogi cyfathrebu cynhwysol ar draws ein gwaith. Mae hyn yn cynnwys cefnogi staff i ddysgu BSL, ac mae rhai cydweithwyr yn defnyddio’u hamser gwaith i fynd ar gyrsiau ar hyn o bryd.
Chwilio am swydd lle gallwch chi wneud gwahaniaeth? Mae recriwt3 yn wefan benodol ar gyfer canfod pobl fedrus, uchelgeisiol i weithio yn y sector gwirfoddol.
Categori | Heb gategori |