Mae effeithiau parhaus yr argyfwng costau byw yn ymestyn adnoddau ymhellach wrth i’r galw am wasanaethau elusennol gynyddu – ydych chi’n barod i ymdopi ag anawsterau ariannol?
BRWYDRAU PARHAUS
Ym mis Ebrill 2024, adroddodd y Fframwaith Rhagoriaeth Elusennau eu bod yn ‘clywed fwyfwy am elusennau yn cau a…phobl yn colli swyddi.’
Yn anffodus, mae llawer gormod o hyn yn digwydd yng Nghymru ac rydym wedi gweld y canlynol:
- Chwarae Teg yn cau o ganlyniad i broblemau ariannol.
- The Care Collective yn cau gan nodi costau cynyddol fel un o’r rhesymau dros gau.
- Scope yn cyhoeddi eu bod yn cau 41 o’u siopau elusen ledled y DU. Mae pedair o’r rhain yng Nghymru, yn Llandudno, Bangor, Pwllheli a Chasnewydd.
WEDI’U HYMESTYN I’R EITHAF
Mae’r argyfwng ariannol presennol wedi arwain at ddirywiad yng nghanran y bobl sy’n rhoi i elusennau. Nododd y Comisiwn Elusennau ostyngiad o 62% yn 2020 i 49% yn 2024, ac mae nifer y bobl sydd angen gwasanaethau elusennol wedi cynyddu o 3% yn 2020 i 9% heddiw.
Mae hyn, ynghyd â’r cynnydd mewn taliadau Yswiriant Gwladol a’r prinder o gyllid sydd ar gael, yn arwain at fudiadau’n cau ar draws y sector a nifer sylweddol o fudiadau’n uno.
Mae’r effaith hon yn cael ei theimlo gan bawb, o elusennau mawr i fudiadau llawr gwlad. Gall hyn arwain at bwysau sylweddol ar elusennau a’u gorfodi i mewn i sefyllfa lle y gall fod angen iddynt gau’n gyfan gwbl.
YMDOPI AG ANAWSTERAU ARIANNOL
Nid yw’n hawdd ymdopi ag anawsterau ariannol, ond gall cael y systemau a’r prosesau rheoli cywir ar waith eich helpu i’w gweld nhw’n gynnar a helpu i liniaru eu heffeithiau rhywfaint. Gall dogfen ganllaw’r Comisiwn Elusennau, Gwella Cyllid eich Elusen – CC12 helpu ymddiriedolwyr gyda’r broses hon.
RHAGOR O GYMORTH
Os yw eich mudiad angen cymorth gyda’r maes hwn, rydym ni yma i helpu. Cysylltwch â’ch Cyngor Gwirfoddol Sirol lleol neu CGGC ac fe wnawn ni ein gorau i’ch llywio drwy hwn.