Mae gan ein tîm Diogelu ddiweddariad cyfreithiol pwysig i staff a gwirfoddolwyr sy’n gweithio gyda phlant.
O 1 Medi 2026, mae’r gyfraith ynghylch gweithgareddau a reoleiddir gyda phlant yn newid. Bydd y rheol bresennol am oruchwylio staff sy’n cael eu talu a gwirfoddolwyr sy’n gwneud gweithgareddau penodol â phlant yn cael ei thynnu o’r diffiniad cyfreithiol.
BETH MAE HYN YN EI OLYGU
Mae hyn yn golygu y bydd rhai pobl mewn gweithgareddau a reoleiddir gyda phlant o 1 Medi 2026 pan nad oeddent o’r blaen, am eu bod yn cael eu goruchwylio’n ddigonol gan rywun arall.
Os oes gennych chi staff neu wirfoddolwyr sy’n gwneud y gwaith canlynol yn ddigon aml gyda phlant: addysgu, hyfforddi, gofalu am neu oruchwylio’r plant, gallai hyn fod yn berthnasol iddyn nhw.
Dyma rai enghreifftiau: gwaith ieuenctid, hyfforddiant chwaraeon, tiwtora celf, gweithgareddau awyr agored.
Bydd y newid yn berthnasol os ydynt yn gwneud y gwaith yn ddigon aml (tair gwaith neu fwy mewn 30 diwrnod) neu dros nos (rhwng 2am a 6am). Pan fydd yr amlder neu’r amod dros nos wedi’i fodloni, bydd y rôl hon yn weithgaredd a reoleiddir, waeth faint o oruchwyliaeth (trosolwg) sy’n cael ei rhoi, a bydd angen gwiriad o’r rhestr wahardd (gweithlu plant).
Gellir gwneud cais am hyn drwy wiriad DBS newydd uwch, na fydd yn uwch na’r un gost o £49.50 am weithwyr sy’n cael eu talu, am ddim i wirfoddolwyr (yn unol â’r diffiniad) a ffi weinyddol eich darparwr.
DARGANFOD MWY
Gellir gweld rhagor o wybodaeth am y newidiadau deddfwriaethol ar wefan Llywodraeth y DU *. Bydd y canllawiau ar wefan y DBS hefyd yn cael eu diweddaru o 1 Medi 2026 i adlewyrchu’r newidiadau hyn.
SUT Y GALL CGGC EICH HELPU GYDA DIOGELU
- Gwasanaeth ymholiadau am ddim sy’n cynnig cyngor a gwybodaeth gyfrinachol un-i-un gan ein Tîm Diogelu
- Gwybodaeth, canllawiau ac adnoddau am ddim am ddiogelu
- Cyflwyniadau, sesiynau gwybodaeth a chymorthfeydd i’ch mudiad neu eich aelodau
- Amrediad o gyfleoedd dysgu, gan gynnwys modiwlau ar-lein, gweminarau a chyrsiau hyfforddi ar-lein (gallwn ystyried hyfforddiant wyneb yn wyneb mewn rhai amgylchiadau)
- Cymuned Ymarfer Diogelu i ddod ag ymarferwyr diogelu’r sector gwirfoddol ynghyd
Os oes gennych unrhyw gwestiynau ynghylch diogelu, cysylltwch â’n Tîm Diogelu drwy anfon e-bost i diogelu@wcva.cymru neu cysylltwch â ni ar 0300 111 0124. Anfonwch e-bost atom ni neu ffoniwch i drafod eich anghenion dysgu diogelu.
*Saesneg yn unig