Mae’n amser ar gyfer Wythnos Gwirfoddolwyr, yr ymgyrch flynyddol ledled y DU i ddathlu a chydnabod cyfraniadau gwirfoddolwyr.
Mae’n Wythnos Gwirfoddolwyr – a dyma’n cyfle i floeddio’n gyhoeddus (neu o leiaf o’n sianeli cymdeithasol):
‘Wrth i Wythnos Gwirfoddolwyr yng Nghymru ddechrau, gadewch i ni ddathlu gwychder cyfunol ein gwirfoddolwyr! Mae eich gweithredoedd unigol o garedigrwydd a chefnogaeth, ledled y genedl, yn creu grym pwerus er budd. Rydych chi’n dod â llawenydd, yn cryfhau ein cymunedau, yn sicrhau bod gwasanaethau hanfodol yn ffynnu, ac yn helpu ein hamgylchedd i ffynnu. Diolch, gwirfoddolwyr Cymru, am y gwahaniaeth anhygoel rydych chi’n ei wneud!’- Felicitie Walls, Rheolwr Gwirfoddoli, CGGC
Yr wythnos hon, 2-8 Mehefin 2025, byddwn yn ymuno â gweddill y DU i ddathlu 41 mlynedd o Wythnos Gwirfoddolwyr. Mae’n amser i fyfyrio, gwerthfawrogi, ac yn bwysicaf oll – dweud diolch.
DIOLCH SYML
Gwyddom mai gwirfoddolwyr yw hanfod cymunedau. P’un a ydyn nhw’n mentora pobl ifanc, yn clirio llwybrau troed, yn cynnal banciau bwyd, neu ond yn cynnig llais cyfeillgar ar y ffôn – mae eu cyfraniad yn amhrisiadwy.
Ond nid oes angen cydnabyddiaeth fawreddog. Gall cerdyn syml o ddiolch, sylw ar y cyfryngau cymdeithasol, neu hyd yn oed rhannu paned a sgwrs wneud byd o wahaniaeth a gwneud i rywun deimlo’n werthfawr, a gwybod ei fod yn bwysig.
Dyma’r amser perffaith i feddwl am yr hyn y gallwch ei wneud i ddangos gwerthfawrogiad i’r gwirfoddolwyr sy’n gwneud cenhadaeth eich mudiad yn bosibl, nid yn unig yn ystod yr wythnos ymgyrchu genedlaethol hon, ond trwy gydol y flwyddyn, yn rheolaidd, yn aml ac yn ystyrlon.
DANGOS EICH GWERTHFAWROGIAD
Gallech chi:
- Ddweud ‘diolch’ yn uniongyrchol wrth wirfoddolwr – yn aml gall y dulliau symlaf, lleiaf wneud y gwahaniaeth mwyaf
- Rhannu adborth gyda gwirfoddolwyr am yr effaith y mae gwirfoddolwyr yn eich mudiad yn ei chael
- Anfon nodyn personol gan Gydlynydd Gwirfoddolwyr, y Prif Swyddog Gweithredol neu ymddiriedolwr, neu fuddiolwr
- Gwneud amser i gael paned a sgwrs gyda gwirfoddolwr
- Rhannu stori gwirfoddolwr ar eich gwefan neu gyfryngau cymdeithasol. Gwnewch yn siŵr eich bod chi’n tagio #WythnosGwirfoddolwyr a #VolunteersWeek yr wythnos hon
CYMRYD RHAN
Gadewch i ni wneud yr Wythnos Gwirfoddolwyr hon yn un i’w chofio – un sy’n dangos i wirfoddolwyr eu bod yn wirioneddol bwysig, yn dathlu eu cyfraniadau, ac yn agor drysau newydd i hyd yn oed mwy o bobl gymryd rhan.
Am ragor o wybodaeth, ewch i wefan Wythnos Gwirfoddolwyr.
CARU EICH GWIRFODDOLWYR?
Y ffordd orau o ddangos eich bod yn gwerthfawrogi eich gwirfoddolwyr yw buddsoddi’r amser mewn creu profiadau gwirfoddoli o ansawdd uchel sy’n bodloni eu galluoedd, cymhellion a dyheadau unigol orau. Gwneud yn siŵr bod eich cyfleoedd gwirfoddoli yn gyfleoedd i wirfoddolwyr deimlo’n ddiogel, wedi’u cynnwys a bod croeso iddynt.
I wybod beth mae hyn yn ei olygu yn ymarferol, edrychwch ar y Cod Ymarfer ar gyfer Cynnwys Gwirfoddolwyr, y gyfres o adnoddau gwirfoddoli ar Hwb Gwybodaeth Cefnogi Trydydd Sector Cymru a’r safonau Buddsoddi mewn Gwirfoddolwyr, gwobr arfer dda, y gellir ei defnyddio fel meincnod.
YDYCH CHI WEDI CLYWED?
Mae ‘dull newydd o wirfoddoli‘ yn cael ei ddatblygu ar gyfer Cymru mewn cyfnod o ymgynghori ar hyn o bryd – rhowch eich barn a chymryd rhan yn yr arolwg.