Cynhelir Dydd Mawrth Rhoi ar 3 Rhagfyr 2024. Mae’n gyfle gwych i fanteisio i’r eithaf ar ymgyrch fyd-eang i helpu i gael mwy o gymorth i’ch mudiad.
Crëwyd Dydd Mawrth Rhoi yn 2012 fel syniad syml: diwrnod sy’n annog pobl i wneud pethau da. Dros y ddegawd ddiwethaf, mae’r syniad hwn wedi tyfu i fod yn ymgyrch fyd-eang sy’n ysbrydoli miliynau o bobl i roi, cydweithio, a dathlu haelioni.
Dydd Mawrth Rhoi yw’r cyfle perffaith i fudiadau:
- Ymhél â rhoddwyr presennol a newydd,
- Lansio neu roi sbotolau ar eich ymgyrch codi arian dros y Nadolig neu ar ddiwedd y flwyddyn,
- Codi ymwybyddiaeth o’ch gwasanaethau,
- Dathlu eich rhoddwyr neu wirfoddolwyr ffantastig, neu
- Rannu storïau gan eich buddiolwyr sy’n dangos eich effaith.
Y nod yw dathlu’r gwaith gwych rydych chi a mudiadau gwirfoddol eraill yn ei wneud, o un dydd i’r llall, ac o un flwyddyn i’r llall, i helpu’r rheini mewn angen a gwneud bywyd yn well.
SUT I GYMRYD RHAN
Yn 2020, gwnaeth Dydd Mawrth Rhoi osod record y byd am y mwyaf o arian a godwyd ar-lein i elusen mewn 24 awr, gyda gwerth £20.2 miliwn o roddion yn cael ei godi mewn un diwrnod. Mae 1.5 miliwn o bobl yn dweud y byddent yn fwy tebygol o wneud rhywbeth i elusen o ganlyniad i Ddydd Mawrth Rhoi.
Amcangyfrifir fod dros £20 miliwn hefyd wedi’i godi ar Ddydd Mawrth Rhoi 2022 o fewn y DU. Gyda Dydd Mawrth Rhoi yn trendio ar Rif 1 ar Twitter, gwelsom negeseuon amlwg o gefnogaeth gan y Gweinidog dros Gymdeithas Sifil, Stuart Andrew AS, yn ogystal â NatWest, cwmnïau stryd fawr, a chapten pêl-droed dynion Lloegr, Harry Kane.
ADNODDAU
Mae ymgyrch Dydd Mawrth Rhoi wedi creu adnoddau i fudiadau eu defnyddio os hoffech chi gymryd rhan. Ewch i wefan Dydd Mawrth Rhoi (Saesneg yn unig) am becyn adnoddau, ynghyd â recordiadau a sesiynau hyfforddi a allai eich helpu i gael y mwyaf o’r ymgyrch, fel ‘Marchnata Digidol ar gyfer Elusennau’ a ‘Defnyddio Canva fel rhywun proffesiynol’. Mae ganddyn nhw hefyd asedau Cymraeg ac adran bwrpasol Cymraeg i’r Pecyn Cymorth, sy’n ei gwneud hi’n haws i elusennau yma yng Nghymru i wneud y mwyaf o’r ymgyrch.
RHANNU EICH NEGESEUON EICH HUN
Nid oes angen i chi gofrestru yn unman i gymryd rhan, nac hyd yn oed defnyddio’r adnoddau a ddarparwyd, gallwch ddatblygu eich negeseuon eich hun ynghylch dathlu eich rhoddwyr, cefnogwyr a gwirfoddolwyr os dymunwch.
Gallwch ddod o hyd i’r ymgyrch ar gyfryngau cymdeithasol gan ddefnyddio #DyddMawrthRhoi, neu ar Twitter, Facebook, LinkedIn neu Instagram, i gael y newyddion diweddaraf, yr adnoddau a’r graffeg ar gyfer eich ymgyrch. Gwnewch yn siŵr eich bod chi’n tagio Dydd Mawrth Rhoi yn eich postiadau i gael eich negeseuon wedi’u rhannu gan yr ymgyrch.