Eich helpu i gadw pobl yn ddiogel

Dylai diogelu fod yn flaenoriaeth i bob mudiad gwirfoddol, yn enwedig y rheini sy’n gweithio gyda phlant, pobl ifanc ac oedolion sydd mewn perygl. Darllenwch fwy am eich cyfrifoldebau a sut gallwn ni helpu.

Mae diogelu da a phriodol yn rhoi sicrwydd i’r cyhoedd ynglŷn â’ch mudiad ac yn cyfrannu at enw da’r sector yn gyffredinol.

Ar y dudalen hon byddwch chi’n dod o hyd i wybodaeth am eich cyfrifoldebau diogelu ac o ble i gael cymorth.

EICH CYFRIFOLDEBAU

  • Mae gan fudiadau sy’n gweithio gyda grwpiau sydd mewn perygl (e.e. plant ac oedolion mewn perygl) gyfrifoldebau cyfreithiol mewn cysylltiad â diogelu 
  • Cyflwynodd Ddeddf Gwasanaethau Cymdeithasol a Llesiant (Cymru) 2014 drefniadau cryf, cadarn ac effeithiol ar gyfer diogelu, trefniadau sy’n seiliedig ar bartneriaeth, lle mae’n rhaid i bob gweithiwr proffesiynol a sefydliad wneud popeth posibl i sicrhau bod plant ac oedolion sydd mewn perygl yn cael eu hamddiffyn rhag camdriniaeth
  • Mae’r Comisiwn Elusennau yn credu bod diogelu yn flaenoriaeth allweddol yng nghyswllt llywodraethu i bob elusen, nid yn unig y rhai sy’n gweithio gyda grwpiau sy’n arfer cael eu hystyried yn rhai ‘agored i niwed’

Mae gan bawb gyfrifoldeb i sicrhau diogelwch – mae’n fater i bawb!

SUT Y GALL CGGC EICH HELPU GYDA DIOGELU

  • Gwasanaeth ymholiadau am ddim sy’n cynnig cyngor a gwybodaeth gyfrinachol un-i-un gan ein Tîm Diogelu
  • Gwybodaeth, canllawiau ac adnoddau am ddim am ddiogelu
  • Cyflwyniadau, sesiynau gwybodaeth a chymorthfeydd i’ch mudiad neu eich aelodau
  • Amrediad o gyfleoedd dysgu, gan gynnwys modiwlau ar-lein, gweminarau a chyrsiau hyfforddi ar-lein (gallwn ystyried hyfforddiant wyneb yn wyneb mewn rhai amgylchiadau)
  • Cymuned Ymarfer Diogelu i ddod ag ymarferwyr diogelu’r sector gwirfoddol ynghyd

Os oes gennych unrhyw gwestiynau ynghylch diogelu, cysylltwch â’n Tîm Diogelu drwy anfon e-bost i diogelu@wcva.cymru neu cysylltwch â ni ar 0300 111 0124. Anfonwch e-bost atom ni neu ffoniwch i drafod eich anghenion dysgu diogelu.

HYFFORDDIANT DIOGELU

Mae ein cyrsiau diogelu wedi’u dylunio’n benodol ar gyfer mudiadau sector gwirfoddol yng Nghymru. Caiff ein hyfforddiant ei arwain gan y Tîm Diogelu yn CGGC sydd â chyfoeth o wybodaeth a phrofiad.

Rydym yn cynnig amrediad o gyrsiau gwahanol i weddu â’ch anghenion, gan gynnwys:

  • Hyfforddiant diogelu i ymarferwyr grŵp B
  • Hyfforddiant diogelu i ymarferwyr grŵp C
  • Diogelu i ymddiriedolwyr ac aelodau bwrdd

Rhagor o wybodaeth.

GWIRIADAU’R GWASANAETH DATGELU A GWAHARDD (DBS)

Yn unol â’r Comisiwn Elusennau, argymhella CGGC y dylid cynnal gwiriadau DBS pryd bynnag y bydd swydd neu rôl y gwirfoddolwr yn bodloni’r meini prawf cymhwysedd. Gellir cael rhagor o wybodaeth a chanllawiau ar wefan y Gwasanaeth Datgelu a Gwahardd* ac ar yr Hwb Gwybodaeth o dan yr adran Llywodraethu Da.

Mae canllawiau DBS ar gael oddi ar DBS ar-lein* a gall mudiadau yng Nghymru gyrchu Gwasanaeth Allgymorth Rhanbarthol DBS: DBSRegionaloutreach@dbs.gov.uk

CYMUNED YMARFER DIOGELU

Rhwydwaith cymheiriaid ar gyfer ymarferwyr ac arweinwyr diogelu yn y sector gwirfoddol.

Nod y Gymuned Ymarfer Diogelu yw hybu a datblygu arfer dda ym maes diogelu ledled y sector gwirfoddol yng Nghymru. Mae’r rhwydwaith yn gymuned o ymarferwyr sy’n cael ei hwyluso gan CGGC a chynrychiolwyr o’r Cynghorau Gwirfoddol Sirol.

Bydd Cymuned Ymarfer Diogelu CGGC yn darparu fforwm i bobl sydd â chyfrifoldebau diogelu o fewn elusennau a mudiadau gwirfoddol i ddod ynghyd, rhannu arfer dda, a thrafod materion amserol.

Mae aelodaeth o’r Gymuned Ymarfer yn cynnig:

  • Digwyddiadau ar-lein i swyddogion ac arweinwyr diogelu gyda siaradwyr arbenigol ar faterion diogelu
  • E-fwletin rheolaidd yn cynnwys y newyddion diweddaraf am ddiogelu
  • Mynediad i drafodaeth fforwm ar-lein wedi’i hwyluso gan CGGC.

Mae aelodaeth yn agored i bobl sydd â chyfrifoldebau diogelu swyddogol o fewn eu mudiadau. Gallai hyn gynnwys:

  • Swyddogion Diogelu neu arweinwyr dynodedig
  • Ymarferwyr Diogelu
  • Ymddiriedolwyr sydd â chyfrifoldeb am ddiogelu

Sut i ymuno

Cysylltwch â safeguarding@wcva.cymru i drafod aelodaeth.

DOLENNI DEFNYDDIOL

CYSYLLTWCH Â NI

diogelu@wcva.cymru

0300 111 0124

*Saesneg yn unig