‘Mae hwn yn ymrwymiad sylweddol ac yn un i’w groesawu…’ Rydyn ni wedi rhyddhau datganiad mewn ymateb i gynlluniau Llywodraeth Cymru i gyflwyno deddfwriaeth ar Hawl y Gymuned i Brynu.
Yn dilyn galwadau gan CGGC a mudiadau gwirfoddol ledled Cymru yn ein maniffesto sector gwirfoddol, rydyn ni wrth ein boddau mai Hawl y Gymuned i Brynu fydd un o’r Biliau cyntaf i gael eu cyflwyno gerbron y Senedd newydd.
Cafodd y cyhoeddiad ei wneud gan Lywodraeth Cymru ar 14 Gorffennaf 2026, dyma ddatganiad gan CGGC ar y newyddion.
DATGANIAD CGGC AR HAWL Y GYMUNED I BRYNU
CGGC yn croesawu ymrwymiad Hawl y Gymuned i Brynu
Mae CGGC yn croesawu cyhoeddiad Llywodraeth Cymru y bydd deddfwriaeth i sefydlu Hawl y Gymuned i Brynu ymhlith y Biliau cyntaf i gael ei chyflwyno gerbron y Senedd newydd.
Hawl y Gymuned i Brynu oedd un o’r cynigion craidd ym maniffesto sector gwirfoddol CGGC ac mae wedi bod yn alwad gan CGGC a mudiadau gwirfoddol ledled Cymru ers tro byd. Mae ei gwneud yn flaenoriaeth ddeddfwriaethol gynnar yn dangos bwriad clir i roi mwy o bŵer i gymunedau amddiffyn yr adeiladau, y tir a’r mannau sy’n bwysig iddynt.
Rhaid datblygu’r ddeddfwriaeth mewn partneriaeth wirioneddol â chymunedau a’r sector gwirfoddol, gan eu cydnabod fel partneriaid cyfartal a defnyddio eu profiad a’u harbenigedd i sicrhau bod yr hawl newydd yn gweithio’n ymarferol.
Ochr yn ochr â hyn, rhaid i gymunedau hefyd allu cael mynediad at y cyngor, y cyllid a’r gefnogaeth ymarferol sydd eu hangen i gael asedau a’u rheoli’n llwyddiannus yn yr hirdymor. Mae hyn yn gofyn am ddull cydgysylltiedig ar draws y llywodraeth a’r sector gwirfoddol sy’n rhoi’r adnoddau a’r gallu i gymunedau lunio lleoedd gwydn, cryfhau economïau lleol a gwella lles.
Dywedodd Lindsay Cordery Bruce, Prif Weithredwr CGGC:
‘Mae hwn yn ymrwymiad sylweddol ac yn un i’w groesawu. Gallai deddfwriaeth Hawl y Gymuned i brynu ystyrlon helpu i sicrhau y gall cymunedau barhau i ddefnyddio asedau hanfodol a rhoi mwy o reolaeth i bobl dros ddyfodol eu lleoedd.
‘Mae CGGC yn edrych ymlaen at weithio gyda Llywodraeth Cymru a’r holl bleidiau yn y Senedd i ddatblygu deddfwriaeth uchelgeisiol, ymarferol sy’n gweithio i gymunedau ledled Cymru.’
RHAGOR O WYBODAETH
I weld mwy:
Gall partneriaid CGGC gael yr wybodaeth ddiweddaraf am yr holl bolisïau a materion gwleidyddol sy’n berthnasol i’r sector gwirfoddol drwy gofrestru i dderbyn ein crynhoad Polisi a Materion Cyhoeddus. E-bostiwch polisi@wcva.cymru am ragor o wybodaeth.