Mae Comic Relief a CGGC yn sylweddoli bod newid parhaol yn dechrau’n aml ar lefel leol. Mae mudiadau cymunedol mewn sefyllfa unigryw i ddeall anghenion y bobl y maen nhw’n eu cefnogi ac i ymateb yn gyflym ac yn dosturiol i’r heriau o fewn eu cymunedau.

Trwy gronfa Cymunedau Cwtsh, mae grantiau rhwng £15,000 a £35,000 ar gael i fudiadau sy’n ceisio creu cwtshys bach o gymorth o fewn eu cymunedau. Nod y rhaglen yw cryfhau gwaith y mudiadau hynny sy’n ceisio mynd i’r afael ag un neu ragor o’r tair thema flaenoriaethol.

Mae’r cyllid dim ond i fudiadau y mae eu cenadaethau’n alinio â’r themâu canlynol. Mae’r themâu hyn yn canolbwyntio ar y pethau hanfodol sydd eu hangen ar bobl i deimlo’n ddiogel, i deimlo eu bod yn cael eu cefnogi a’u bod yn gallu ffynnu:

• Anghenion Sylfaenol – cefnogi unigolion a theuluoedd sy’n wynebu pwysau costau byw, tlodi, neu ddiffyg mynediad at nwyddau a gwasanaethau hanfodol.
• Iechyd (Datblygiad Plentyndod Cynnar) – cefnogi llesiant a datblygiad plant ifanc a’u teuluoedd, yn arbennig yn y blynyddoedd cynnar.
• Diogelwch – cynorthwyo mudiadau sy’n gweithio gydag unigolion a chymunedau a effeithiwyd gan drais, dadleoliad neu ymyleiddio.

Mae grantiau rhwng £15,000 a £35,000 ar gael i fudiadau sydd eisiau cryfhau eu heffaith ar gymunedau drwy wasanaethau uniongyrchol ac ymyriadau go iawn.

Bydd disgwyl i brosiectau llwyddiannus ddangos effaith y grant drwy adrodd storïau a gweithgareddau cyhoeddusrwydd.

I wneud cais am Grant Cymunedau Cwtsh, bydd angen i chi gofrestru gyda Phorth Ceisiadau Amlddefnydd CGGC (MAP). Os ydych wedi cofrestru gyda MAP o’r blaen, gallwch fewngofnodi trwy roi eich enw defnyddiwr a’ch cyfrinair ar y sgrin gartref.

Gall mudiadau gofrestru drwy fynd i’r wefan map.wcva.cymru.

Os oes angen help arnoch i gofrestru ar MAP dilynwch y fideo hwn.

Diben yr arweiniad hwn yw helpu ymgeiswyr i ddeall mwy am Grant Cymunedau Cwtsh Comic Relief.

I gael mwy o gymorth, cysylltwch â’ch Cyngor Gwirfoddol Sirol lleol.

Mae’r gronfa yn canolbwyntio ar waith sy’n helpu pobl i ddiwallu eu hanghenion sylfaenol, yn hybu lles plant ifanc a theuluoedd ac sy’n creu cymunedau mwy diogel a chynhwysol.

Gallai hyn gynnwys banciau bwyd neu geginau cymunedol sy’n mynd i’r afael â newyn, prosiectau sy’n darparu hanfodion fel dillad cynnes neu eitemau hylendid, neu hybiau cymunedol sy’n cynnig cymorth mewn argyfwng.

Mae gennym hefyd ddiddordeb mewn gweithgareddau blynyddoedd cynnar fel grwpiau rhiant a phlant, sesiynau dysgu a redir gan y gymuned neu brosiectau â chymorth cymheiriaid a arweinir gan rieni â phrofiadau bywyd.

O dan ein thema diogelwch, rydym yn gobeithio cefnogi canolfannau menywod, grwpiau i ffoaduriaid a cheiswyr lloches a mannau diogel a chroesawgar i fenywod, pobl LHDTC+ a phobl eraill a allai fod mewn perygl.

Os oes gennych unrhyw gwestiynau neu os hoffech siarad â ni am eich syniad prosiect, cysylltwch â’r Tîm Grantiau ar 0300 111 0124 neu anfonwch e-bost atom yn comicreliefgrants@wcva.cymru.