Rhaglen cyllid grant i helpu cymunedau sy’n byw o fewn pum milltir i rai gorsafoedd trosglwyddo gwastraff neu safleoedd tirlenwi weithredu dros eu hamgylchedd lleol.

Bydd y prosiectau a gyllidir yn canolbwyntio ar un neu ragor o’r themâu canlynol:

Bioamrywiaeth – creu rhwydweithiau ecolegol cydnerth er budd amrediad o gynefinoedd a rhywogaethau:

Lleihau gwastraff a gwyro gwastraff o safleoedd tirlenwi – hyrwyddo ymwybyddiaeth ac ymarfer gorau er mwyn lleihau maint y gwastraff sy’n cael ei gynhyrchu:

Gwelliannau amgylcheddol ehangach – dod â budd ehangach i’r gymuned drwy wella ansawdd y lle:

Am ragor o wybodaeth, darllenwch ein canllawiau ar y cynllun.

Bydd Cynllun Cymunedau y Dreth Gwarediadau Tirlenwi yn cyllido prosiectau o fewn pum milltir i rai gorsafoedd trosglwyddo gwastraff neu safleoedd tirlenwi. Safleoedd cymwys yw’r rhai hynny a adroddodd eu bod wedi anfon mwy na 2000 tunnell i safle tirlenwi yn ystod y flwyddyn adrodd, ac sy’n cael eu hadolygu bob blwyddyn.

Gall prosiectau bioamrywiaeth sy’n ymestyn y tu allan i’r cwmpas o bum milltir gael eu hystyried, gan nad yw cynefinoedd (fel afonydd) yn cydnabod ffiniau a gallai’r buddion gyrraedd ardaloedd ehangach. Bydd ceisiadau o’r fath yn cael eu hystyried yn unigol am gyllid llawn neu rannol.

Os nad yw eich prosiect o fewn ardal gymwys, neu os ydych chi’n ansicr a yw eich prosiect yn gymwys o dan feini prawf y thema, cysylltwch â ldtgrants@wcva.cymru neu eich Cyngor Gwirfoddol Sirol lleol am ganllawiau pellach os gwelwch yn dda.

Defnyddiwch y map i weld a ydych o fewn pum milltir i orsaf trosglwyddo gwastraff neu safle tirlenwi cymwys. Gallwch symud y map o gwmpas drwy ei glicio a’i lusgo gyda’ch llygoden. I chwyddo’r map, pwyswch y botwm CTRL ar eich bysellfwrdd a defnyddiwch yr olwyn sgrolio ar eich llygoden. Bydd ardaloedd cymwys wedi’u lliwio’n goch gyda phin yn y canol. Bydd y map yn cael ei ddiweddaru cyn i gylch cyllido agor a bydd yn dangos y safleoedd cymwys ar gyfer y cylch hwnnw.

Cyfeiriwch at ganllawiau’r cynllun i weld yr holl feini prawf cymhwysedd a rhestr o’r mathau o fudiadau y byddwn yn eu hariannu.

Am ragor o wybodaeth, darllenwch ganllawiau llawn y cynllun yma. Mae’r canllawiau hyn yn cynnwys dolenni i adnoddau a all eich helpu i ychwanegu at eich syniadau prosiect i gyfrannu at dair thema’r cynllun.

I gael mwy o gymorth, cysylltwch â’ch Cyngor Gwirfoddol Sirol lleol.

Os oes gennych unrhyw gwestiynau neu os hoffech siarad â ni am eich syniad am brosiect, cysylltwch â’r Tîm Grantiau ar 0300 111 0124 neu anfonwch e-bost atom yn ldtgrants@wcva.cymru.

I dderbyn y newyddion diweddaraf ar gyllid CGGC, cofrestrwch ar restr bostio cyllido CGGC.