Rydym ni, ynghyd ag amrywiaeth o randdeiliaid gwirfoddoli, yn gyffrous i lansio ein Dull Newydd o Wirfoddoli yng Nghymru.
Rydym wedi bod yn gweithio gydag amrywiaeth o randdeiliaid gwirfoddoli fel rhan o’r Grŵp Arwain Traws-sector ar Wirfoddoli (Grŵp Arwain) i gyd-greu’r hyn rydym yn ei alw nawr yn ‘Ddull Newydd’ o wirfoddoli yng Nghymru, ac mae hwn yn cael ei lansio heddiw yn gofod3.
PAM DULL NEWYDD?
Gwnaeth Ysgrifennydd y Cabinet dros Gyfiawnder Cymdeithasol Llywodraeth Cymru, Jane Hutt AS, Ddatganiad allweddol yn yr Wythnos Ymddiriedolwyr.
‘Rydw i eisiau adeiladu dull gweithredol a phenderfynol o gyflwyno’r cyflyrau a’r cymorth y mae gwirfoddolwyr eu hangen ac yn eu haeddu, fel y gallant dyfu a ffynnu yn y gwaith hanfodol y maen nhw’n ei wneud i bawb yng Nghymru, ei phobl, ei lleoedd a’i chymunedau.’
I wneud hyn, mae angen i ni gydnabod natur newidiol bywydau pobl a’r ffyrdd y mae gwirfoddoli yn rhyngweithio â’u profiadau bob dydd. Mae’n hanfodol ein bod yn datblygu’r ffordd rydym yn denu, recriwtio ac yn cadw gwirfoddolwyr ar draws y sbectrwm gwirfoddoli, o’r rhwydweithiau cymorth anffurfiol y gwelsom yn ystod y cyfnodau clo i wirfoddoli a gefnogir gan gyflogwyr.
BAROD I LANSIO
Ar ôl misoedd o ymgynghori â’r sector yn ystod datblygiad cychwynnol Fframwaith Gweledigaeth a Chyflawni’r Dull Newydd, ac wedyn ymgynghori’n ehangach ar y drafftiau, mae’r Dull Newydd bellach wedi’i gyhoeddi ac ar gael i’w ddefnyddio.
Lansiwyd y Dull Newydd yn nigwyddiad blaenllaw CGGC, gofod3, gan Jane Hutt AS, gyda chefnogaeth nifer o randdeiliaid sy’n cefnogi’r Weledigaeth a’r dull sy’n cael ei ddefnyddio. Ymhlith y rhain roedd:
- Derek Walker, Comisiynydd Cenedlaethau’r Dyfodol
- Y Farwnes Tanni Grey-Thompson
- Dr Lindsay Cordery-Bruce, Prif Gyfarwyddwr CGGC
- Anthony Hunt, Arweinydd Cyngor Bwrdeistref Sirol Torfaen
- Nick Speed, Pennaeth Gwledydd a Rhanbarthau BT, Polisi a Materion Cyhoeddus
BETH NESAF?
Bydd y Grŵp Arwain yn canolbwyntio ar greu cynllun gweithredu i gefnogi’r gwaith o fabwysiadu’r Dull Newydd ledled Cymru, gan gynnwys datblygu canllawiau ac adnoddau. Cadwch lygad allan am y rhain yn y dyfodol agos.
Yn y cyfamser, os oes gennych ddiddordeb mewn bod yn rhan o’r Weledigaeth a’n helpu ni i’w chyflawni, cysylltwch â ni fel y gallwn drafod sut i’ch cynorthwyo. Cysylltwch â ni yn gwirfoddoli@wcva.cymru.