Yn dilyn proses recriwtio agored, mae’n bleser gan CGGC gyhoeddi mai Neil Wooding CBE sydd wedi’i benodi fel Cadeirydd ym mis Tachwedd 2022.
Ar ôl wyth mlynedd o arweinyddiaeth ragorol fel Cadeirydd CGGC, bydd Peter Davies yn rhoi’r gorau i’r rôl ym mis Tachwedd 2022. Er mwyn paratoi ar gyfer hyn, rydyn ni wedi cynnal proses recriwtio agored i ddod o hyd i Gadeirydd newydd.
Gwnaeth ein chwiliad, a arweiniwyd gan gwmni recriwtio Acorn, arwain at y penderfyniad unfrydol o benodi Neil Wooding CBE.
NEIL WOODING CBE
Cafodd y penderfyniad i recriwtio Neil ei seilio ar ei brofiad helaeth sy’n cyd-fynd â’n nodau fel mudiad wrth i ni edrych tua’r dyfodol.
Mae gan Neil, a enillodd CBE am ei wasanaethau i gyfiawnder cymdeithasol a chydraddoldeb, gyfoeth o wybodaeth a phrofiad yn y meysydd cydraddoldeb, amrywiaeth a chynhwysiant, arloesedd digidol a gwella gwydnwch. Mae’r holl bethau hyn yn allweddol i’n strategaeth newydd ni a fydd yn cael ei lansio ym mis Ebrill.
Mae Neil wedi gweithio mewn swyddi uchel yn Llywodraeth y DU a Llywodraeth Cymru ac mae ganddo brofiad helaeth fel ymddiriedolwr nifer o fudiadau gwirfoddol, gan gynnwys Stonewall UK, Sefydliad Bevan a’r ‘Lloyd’s Bank Foundation Trust’.
Bydd gwybodaeth a phrofiad Neil, ochr yn ochr â’n bwrdd ymddiriedolwyr amrywiol a brwdfrydig, yn gaffaeliad go iawn i CGGC. Bydd hefyd yn gaffaeliad i’n haelodau wrth i ni i gyd wynebu rhai o’r heriau sydd o’n blaenau ni, fel y cyllid Ewropeaidd yn dod i ben, addasu i ffyrdd newydd o weithio a gwella cydraddoldeb i bawb.
CAMAU NESAF
Mae Peter Davies wedi cyfrannu’n helaeth at y gwaith o arwain CGGC a’r sector, felly roeddem ni eisiau sicrhau cyfnod trosglwyddo hir. Bydd Peter a Neil yn treulio amser gyda’i gilydd yn ystod y misoedd i ddod er mwyn sicrhau cyfnod pontio llyfn.
Bydd Neil hefyd yn ymuno â CGGC mewn digwyddiadau allweddol rhwng nawr a mis Tachwedd, a bydd cyfle i aelodau ymuno â sesiwn banel holi ac ateb unigryw i aelodau yn unig gyda Peter, Neil a’n Prif Weithredwr, Ruth Marks, yn gofod3.
Bydd rhaglen gofod3 yn cael ei chyhoeddi ym mis Mai er mwyn i gynrychiolwyr gadw lle ar y sesiynau. Cadwch lygad ar ein cyfryngau cymdeithasol a chofrestrwch i gael ein cylchlythyr er mwyn cael yr wybodaeth ddiweddaraf.
Rydyn ni’n edrych ymlaen at groesawu Neil i deulu CGGC a rhoi cyfle i’n haelodau ddod i adnabod ein Cadeirydd newydd.